Snow World, nilagyan ng matataas na buildings, historical structures at 2 coffee shop

MAS exciting at mas masaya ang mga taong nakadalaw na sa Snow World Manila nang magbukas ito ngayong taong ito. Mas pinalaki na kasi ang snow play area na makapaglalaro sila sa snow. Mas ginawa ring exciting ngayon ang kanilang man made ice slide na sinasabing pinaka- mahabang man made ice slide sa buong mundo.

Ang Snow World Manila ay itinuturing na ring isa sa pinakamaganda, at pinaka-modernong indoor snow attraction ng International Society of Ice Carvers, na siyang organizer ng World Ice Art Championships na ginagawa sa Fairbanks, Australia taon-taon. Dahil din naman sa pagkilalang iyan kaya lalo namang pinaganda pa ang Snow World. Sa taong ito nga, itinampok din nila ang mga nagtataasang mga building at historical structures mula sa iba’t ibang bahagi ng mundo.

Ginawa na ring dalawa ang coffee shop sa loob ng Snow World na maaaring magpahinga at uminom ng mainit na kape kung napagod na sa paglalaro at pamamasyal.

Hindi rin tulad ng ibang snow attractions na bilang lang ang mga araw, ang Snow World ay bukas araw-araw at madarama ninyo ang winter araw-araw sa buong isang taon. Marami ring iba’t ibang nababagong attractions para ang mga nakapunta na ay may makitang pagbabago ulit sa kanilang pagbabalik. Kung ano ang okasyon, iyon din ang gayak ng Snow World.

Ang Snow World na matatagpuan sa Star City ay bukas na ngayon araw-araw mula 4:00 p.m. kung simpleng araw at mula 2:00 p.m. ng Biyernes hanggang Linggo. Ito lamang ang nag-iisang tunay na snow attraction sa ating bansa at ngayon nga ay sinasabing isa sa pinakamaganda sa buong mundo.