P3-M shabu mula sa Munti nasabat sa Silay City

BACOLOD CITY – Tinatayaang aabot sa P3.3 milyon ang halaga ng 18 pakete ng shabu na nakapaloob sa isang package na ipinadala sa pamamagitan ng courier company na LBC kamakalawa.

Galing sa isang nagngangalang Pocholo Bernabe ng Muntinlupa ang package na ipinadala kay Jimcel Balboa, 27, ng Brgy. Guinhalaran, Silay City, Negros Occidental.

Ngunit iginiit ni Balboa, sa kanya lamang ipinangalan ang package na para sa kababata niyang si Dennis Esmeralda mula sa Muntinlupa at dalawang linggo pa lamang sa Silay.

Si Esmeralda ay sinasabing no. 1 drug personality ng Muntilupa at tumakas doon dahil sa pinaigting na kampanya laban sa ilegal na droga.

Nang suriin ng pulisya ang package ng mga bote ng shampoo at lotion, natuklasan ang mga pakete ng shabu na may kabuuang bigat na 329 grams.