Dyowa ng sekyu ni VP Robredo sangkot sa droga

KINOMPIRMA ng Office of the Vice President, ang isang security detail ni Vice President Leni Robredo na si PO3 Joey Regulacion ay live-in partner ng babaeng sumuko sa mga pulis makaraan makatok sa Oplan Tokhang ng Quezon City Police District sa Brgy. Culiat nitong Miyerkoles.

Ayon kay Georgina Hernandez, tagapagsalita ni Robredo, pinabalik muna si PO3 Regulacion sa kanyang mother unit habang iniimbestigahan ng PNP.

Ikinalungkot aniya ni Robredo ang pangyayari at nagpahayag ng pagsuporta sa ano mang imbestigasyong ng pulisya.

Ayon kay Quezon City Police District Director Sr. Supt. Guillermo Eleazar, isasailalim sa drug test ang security detail ni Robredo na si Re-gulacion upang malaman kung gumagamit siya ng illegal na droga lalo’t lumalabas sa intelligence report ng pulisya na supplier ng droga ang live-in partner ng pulis.

Walang nakuhang droga o paraphernalia ang PNP sa live-in partner ng isang PSG security escort ni Vice President Robredo.

Ito ang iniulat ng QCPD sa ipinadalang report sa office of the Vice President.