Absolute pardon kay Robin Padilla (Posible kay Duterte)

KABILANG ang aktor na si Robin Padilla sa listahan ng Board of Pardons and Parole (BPP) na posibleng gawaran ng executive clemency ni Pangulong Rodrigo Duterte.

Inirekomenda ng BPP ang review sa kaso ng 87 inmates na mabibigyan ng executive clemency, kabilang si Padilla, sa pamamagitan ng ‘notice’ na nilagdaan ng kanilang executive director na si Reynaldo Bayang.

Matatandaan, hinatulan ng Angeles City Regional Trial Court si Padilla ng 21-taon pagkabilanggo dahil sa illegal possession ng high-powered firearms noong April 1994.

Tatlong taon ang iginugol ni Padilla sa New Bilibid Prison magmula noong April 1997.

Pagkatapos ay binigyan siya ng conditional pardon ni dating Pangulong Fidel V. Ramos.

Ngunit ayon sa abogado ni Padilla na si Rudolf Jurado, expired na noong 2003 pa ang conditional pardon na iginawad sa aktor.

Sinabi niyang maaari pang mag-apply sa absolute pardon si Padilla.

Sakaling mabigyan nang executive clemency ang aktor, maibabalik muli sa kanya ang kanyang civil rights kabilang na ang kanyang karapatang bumoto.

Sa katunayan aniya, kanya nang naisumite noong nakaraang linggo ang requirements ng kanyang kliyente sa aplikasyon para sa executive clemency.

Medyo nag-aalangan pa aniya si Padilla na humingi ng absolute pardon mula sa pangulo dahil baka isipin ng mga tao na binibigyan siya ng pabor dahil sa pagsuporta sa Presidente noong panahon ng eleksiyon.