Wally Bayola, utang na loob ang tagumpay sa fans at sa Eat Bulaga

ITINUTURING ni Wally Bayola na utang na loob niya sa mga tumatangkilik sa kanya ang anumang tinatamasa ngayong tagumpay. Bukod sa fans at manonood, malaking bahagi raw ang Eat Bulaga kung nasaan man siya ngayon.

“Kapag nasa Juan For all, All For One kami, kahit umuulan at binibigyan nila kami ng paying, hindi namin ginagamit. Kung mainit, okay lang na maarawan kami at mainitan. Kasi, kung iyong mga tao roon na kasama namin, iyong mga nanonood naiinitan at nauulanan sila, dapat kami rin. Sama-sama kami, kumbaga.

“Utang ko sa mga tumatangkilik sa amin ang lahat ng ito, at siyempre sa Eat Bulaga. Siyempre yung utang na loob ko sa Eat Bulaga, talagang sobra-sobra. Kung hindi nila ako kinuha dito, kung hindi dahil sa Eat Bulaga, wala lahat ng ito,” saad ni Wally nang makapanayam namin sa The PEP List Year 3 Awards Night na ginanap sa Grand Ballroom ng Crowne Plaza last week.

Nanalo bilang Male Comedy Star of the Year ng gabing iyon si Wally.

Naibalita rin niya na ginagawa na nila ngayon ag pelikulang Enteng Kabisote 10 na pinagbibidahan ni Vic Sotto. Dito’y magkakasamang muli ang JoWaPao (Jose Manalo, Wally, at Paolo Ballesteros).

Nabanggit nga rito ni Wally na either sa last week ng August or this coming September ay babalik na sa EB si Paolo.

“Manggagaling talaga ang kompirmasyon nang pagbabalik ni Paolo sa EB sa management. Wala pa namang sinasabi, pero malapit na malapit na. Baka last week of August or September, mga ganoon.”

Sinabi rin niya kung gaano sila kalapit na tatlo. “Talagang close na kaming tatlo, si Paolo kasama ko iyan sa sasakyan e. Parang isang pamilya na talaga kami, ‘pag nagkakaisa kami, kung ano-ano ang katatawanang nagagawa namin.

“May lungkot pero di puwedeng mabali, so kailangan tuloy ang trabaho, tuloy pa rin ang show.

“Kaya nga sabi ko, parang ang naging motto namin, divided we fall, united we stand,” nakangiting saad pa ni Wally.

Ano ang ibinigay niyang payo kay Paolo? “Ang talagang advice lang namin sa isa’t isa, pray lang iyan. Kung ano ang advice niya sa akin dati ay iyon din ang advice ko sa kanya ngayon at nakatulong nang malaki talaga iyon.

“Dapat be positive lagi and be happy lang, good vibes lang palagi dapat.”

ALAM MO NA! – Nonie V. Nicasio