HATAW! D'yaryo ng Bayan hatawtabloid.com
NAKATUTUWA ang bumubuo ng Lucky 7 Koi Productions Inc., dahil sa dalas nilang magkita-kita sa Solaire Resort & Casino, napagkasunduan nilang gumawa ng isang concert, ito nga ang Powerhouse: A Concert of World-Class Pinoy Performers @ The Theater.
Ang Powerhouse concert ay magaganap sa Oktubre 28, 7:30 p.m. sa The Theater ng Solaire. Binuo at pinagsama-sama ng Lucky 7 ang magagaling na world-class performers para sa isang musical showdown, ito nga ay sina Arnel Pineda, Michael Pangilinan, Morissette, The 4th Impact, Mayumi, at ang T.O.M.S. Band.
Ayon sa Lucky 7 Koi Productions Inc., big fan sila ng music kaya naman napagkasunduan nilang mag-prodyus ng isang concert.
“Dream naming madala si Adelle sa Pilipinas and also Barbra Streisand,” sambit ni Atty. Carmelita Lozada. “But we cannot afford it. If we only can afford, why not,” nangingiting dagdag pa nito.
Sinabi pa ng Lucky 7 Koi Productions Inc., na umaasa silang makapag-prodyus ng tatlong concert every year.
“Gusto rin naming magkaroon ng reunion ang Rivermaya at mapagsama sina Rico Blanco at Bamboo. Gusto rin naming magkaroon ng concert dito sa Solaire si Lea Salonga,” sambit pa ng isa sa prodyuser ng konsiyerto.
Iginiit pa ng Lucky 7 na umaasa silang magiging matagumpay ang Powerhouse concert dahil, “If we cannot make this successful paano pa kami pagkakatiwalaan ng Solaire. Kaya nga humihingi kami ng tulong para maging successful itong aming first venture.”
Ang Lucky 7 Koi Productions Inc., ay binubuo nina Lily Chua, Joan Alarilla, Atty. Lozada, Carol Galope, Rosalinda Ong, Neth Mostoles, at Liza Licup. Kasama rin nila bilang board of directors sina Divine Arellano at Emy Domingo.
SHOWBIZ KONEK – Maricris Valdez Nicasio
