San Miguel Bulacan dinaanan ng buhawi 17 pamilya apektado

UMAABOT sa 17 pamilya ang naapektohan ng paghagupit ng buhawi sa San Miguel, Bulacan nitong Martes.

Bandang 9:30 pm nang manalasa ang buhawi sa Zone 2, 3, 4 sa Brgy. Sibul, ayon kay John Mendez ng Municipal Disaster Risk Reduction and Management Office.

“Nasorpresa po ang lahat… Ang mga kabahayan po, karamihan, natangay ang bubong,” kwento ni Mendez.

Walang nasaktan sa insidente ngunit tinatayang 17 pamilya o 85 katao ang naapektohan ng buhawi.

Nitong Linggo, tinamaan ng buhawi ang Quezon City at Maynila.

Dalawang residente ng Maynila ang nasugatan sa insidenteng nakaapekto sa 100 bahay.

Habang nawalan ng koryente ang 500 bahay sa Quezon City dahil sa pagdaan ng malakas na hangin.