Obrero patay sa saksak ng karibal

SELOS ang isa sa motibong tinitingnan ng Pateros Police kung bakit sinaksak hanggang mapatay ang isang obrero ng karibal niya sa pag-ibig nitong Lunes ng gabi.

Hindi na umabot nang buhay sa Rizal Medical Center ang biktimang Noel Reyes, 49, ng 1148 Alley 9, Brgy. Santa Ana ng naturang bayan.

Habang tinutugis ng mga awtoridad ang suspek na si Louie Mabingnay, 42, ng Ipot Jam, P. Rosales St., Pateros.

Sa imbestigasyon ng Pateros Police, nangyari ang insidente dakong 9:00 pm malapit sa bahay ng biktima sa naturang lugar.

Nakatayo ang biktima nang biglang sumulpot ang suspek at agad siyang sinaksak.

Sa pahayag  ng kinakasama ng biktima na si Josephine sa Pateros Police, dati niyang kinakasama ang suspek, limang taon na ang nakalilipas.

Ayon sa kanya, mula nang magsama sila ng biktima ay lagi na silang nakatatanggap ng pagbabanta mula sa suspek.

( JAJA GARCIA )