Komander patay, 10 huli sa drug raid sa S. Kudarat

COTABATO CITY – Patay ang isang komander habang 10 sa kanyang mga kasamahan ang naaresto sa isinagawang drug raid dakong 5:00 am kahapon sa probinsya ng Sultan Kudarat.

Kinilala ang namatay na si Ugalingan Manuel, Jr. alyas Komander Boyet.

Ayon kay Sultan Kudarat police provincial director, Senior Supt. Raul Supiter, sinalakay nang pinagsanib na puwersa ng pulisya at mga sundalo ang bahay ni Manuel sa Sitio Ogis, Brgy. Marguez, Esperanza, Sultan Kudarat, ngunit lumaban at nakipagpalitan nang putok sa mga awtoridad.

Napatay si Komander Boyet ng raiding team habang nahuli ang kanyang mga kasamahan.

Sinasabing isa rin ang sugatan sa nasabing lawless group.

Narekober ng raiding team ang isang cal. .45 pistol, AK-47 rifle, dalawang M-14 rifles, isang M203 rifle, tatlong garand rifles, isang M79, round ng RPG, dalawang rounds ng 40mm, assorted ammos, bandoliers, 10 big sachets ng suspected shabu at drug paraphernalia.

Ang mga suspek ay hawak ngayon ng pulisya at patuloy na iniimbestigahan.