Tulak sa showbiz, VIPs todas sa shootout

DALAWA ang patay, kabilang ang sinasabing supplier ng illegal na droga sa mga artista at diplomat, makaraan lumaban sa mga pulis sa San Pedro, Laguna nitong Huwebes ng umaga.

Isinisilbi ng mga tauhan ng Anti-Illegal Drugs Group ng pulisya ang search warrant sa sinasabing drug supplier na si Alvin Comerciante sa bahay niya sa Block 1A, Lot 10, Jasmine St. kanto ng Adelina Ave., Adelina Subdivision, San Pedro, Laguna.

Kapwa napaslang sina Comerciante at isa pang hindi nakilalalang suspek sa gitna ng operasyon.

Ayon sa mga pulis, may ilan din silang naaresto, kasama ang kinakasama ni Comerciante na si Cristine Padilla, sinasabing kamag-anak ng aktor na si Robin Padilla.      Si Comerciante ang sinasabing taga-suplay ng bawal na gamot sa ilang show business personality at diplomat.

Ginagamit din siyang hitman ng mga drug lord na nakapiit sa New Bilibid Prisons (NBP) at iba pang penal colony.

Partikular na target ni Comerciante ang mga ka-transaksiyon ng mga drug lord na nabibigong bayaran ang kinuhang droga.

Habang itinanggi ni Padilla na sangkot siya sa ilegal na gawain ng nobyo.

Katunayan aniya, sinasaktan siya ni Comerciante tuwing sinusubukan niyang iwanan ang suspek.

Inaalam pa ng pulisya kung sino ang mga personalidad na suki ni Comerciante.