Unang advocacy film ni William Thio, ipapalabas na sa mga paaralan

TALIWAS sa ibang independent film na namamayagpag sa industriya ngayon, ang pelikula ng TV host, news anchor, at commercial model na si William Thio ay mag co-concentrate sa pagpapalabas sa mga eskwelahan sa buong bansa simula ngayong Agosto, 2016. Gawa ito ng magpinsang independent movie producer na nagtayo ng Sparkling Stars Production, sina Johnny Mateo at Shubert Dela Cruz.

“Mahirap kasing ipalabas ito commercially dahil sa matinding problema nang piracy sa bansa. Mas gusto namin na mapanood ito ng mga kabataan na hindi na kailangan pang pumunta sa sinehan,” saad ni Johnny na siyang tumatayong promoter na rin ng pelikula.

Pinamagatang Barkong Papel, nakasentro sa istorya ang dalawang magkaibigan na mula pagkabata ay nangarap na maging successful sa buhay. Ginampanan ito nina William at ang baguhang aktor na si JC Lazaro. Ito rin ang unang proyekto nang kontrobersyal na singer na si Mystica sa kanyang pagbabalik-showbiz. Tinanggap rin ng Kapusong si Mara Alberto ang kanyang role bilang kasintahan ni William dahil sa ganda nang istorya nito.

Ilan pa sa mga tampok dito sina Junar Labrador, Anndrine Agbin, John Kenneth Caro, DJ Buddha, Lina Rowy,  Axel Fortuno, Zaito, Clark Aquino, Chino Sabile at Kiel Lloyd Isip. Ito’y sa direksyon ni Sky Dela Cruz, na kahot baguhan ngunit lumaki na sa produksyon ng kanyang amang si Shubert.

Kasalukuyang hinihintay ng pamunuan ng Sparkling Stars ang rekomendasyon ng Department of Education para madali na itong maipalabas sa mga eskuwelahan at makakuha ng isang daang porsiyentong suporta ng bawat eskuwelahang lalapitan ng grupo. Ang Sparkling Stars Production ay limang taon na sa paggawa ng makabuluhan at may-aral na pelikula na nakakuha ng DepEd recommendation gaya ng Potpot na isang anti-bullying film, Daniel na nakatuon sa environmental awareness and leadership at Salamin ng Buhay ukol naman sa mga kasalukuyang isyu ng buhay.

Sa mga interesadong maipalabas sa kanilang paaralan ang mga pelikulang ito, mag-message lamang po sa Facebook page ng Sparkling Stars Production o kay Johnny Mateo sa 09177477386 at 09215855060.

ALAM MO NA! – Nonie V. Nicasio