Suspek sa rape-slay sumuko

BOLUNTARYONG sumuko ang 42-anyos suspek na gumahasa at pumatay sa dalagitang si Queence Star Delos Reyes, na itinapon ang bangkay sa ilog ng Soccoro sa Calapan City.

Ayon kay Provincial Director, Senior Supt. Florendo Quibuyen, isasailalim sa interogasyon ang isa sa mga suspek na si Leo James Macalalad, barangay councilor  ng San Vicente South (Bagong Pook), una nang inamin ang brutal na pagpatay sa biktima nitong nakaraang araw.

Sa himpilan ng pulisya, inamin ng suspek na ibinalot ng bedsheet, itinali at itinapon niya ang bangkay ng biktima sa nasabing ilog.

Natagpuan ang naaagnas nang katawan sa tabing highway ng Pasi boundary ng Batong Dalig sa ilog ng Socorro nitong Linggo ng umaga.

Sinasabing pinatay ang dalagita sa pamamagitan ng 21 saksak, paghampas ng matigas na bagay sa ulo at mukha kaya halos hindi na makilala, saka itinapon ang katawan sa ilog.

Napag-alaman, magkaibigan ang suspek at biktima.

Paniwala ng mga awtoridad, ginahasa ang biktima bago pinatay dahil wala na siyang panloob nang matagpuan.