Dating vendor sa Quinta market nakaharang ngayon sa kalye

PAGKATAPOS magawa ang gusali ng Quinta market sa Quiapo, Maynila, lalo pa yatang dumami ang mga illegal vendor ngayon sa paligid ng nasabing palengke.

Bakit ‘kan’yo?

Marami kasi sa mga dating nagtitinda sa loob ‘e ginawa nang ‘bahay’ ang lugar na pansamantalang pinagpuwestohan sa kanila sa kanto ng C. Palanca at Quezon Blvd.

Bumalik sila sa lumang palengke, pero ang mga gamit nila ay iniwan doon sa tabi ng PNB.

‘Yung iba naman, doon na mismo nagsipagtinda dahil mas mababa ang binabayaran nilang ‘upa’ o ‘tong.’

Kaysa naman sa bagong gusali na baka nga naman, ipaghahanabuhay lang nila ang nasabing palengke at ipasa sa kanila ang hindi rasonableng singil para habulin ang ginastos sa pagpapagawa ng nasabing gusali.

Magkakandakuba sila sa kahahabol ng kita para maipambayad lang sa bagong palengke.

Kaya siguro mas marami sa kanila ang hindi na bumalik sa loob ng Quinta market.

Ang siste, apektado naman ang mga may tindahan na tinambakan ng gamit ng mga dating taga-Quinta market na ngayon ay ayaw nang bumalik.

Akala ng mga negosyante sa nasabing area, matatapos na ang pagtitiis nila nang matapos na ang palengke, pero maling akala dahil ayaw nang alisin doon ng mga vendor ang kanilang mga gamit.

Sonabagan!!!

‘Wag po kayong magagalit ha, pero sa ganyan ninyong attitude, mababansagan na naman kayong utak-iskuwater.

Gusto na naman ninyo, lahat ng bakanteng puwesto sa inyo?!

Ang isa pang ikinaiinis ng mga store owner, dahil may nakaharang sa harap ng tindahan nila, natatakot tuloy pumasok ang mga customer.

Kaya apektado na rin ang sales nila.

Doon na sila nakaistambay, naglalaro ng pool, nag-iinuman at kung ano-ano pa.

Higit sa lahat nagiging ‘cover’ at tambayan din ng mga snatcher at holdaper.

Paging MPD Plaza Miranda PCP!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN – Jerry Yap