HATAW! D'yaryo ng Bayan hatawtabloid.com
NILINAW ng Palasyo na hindi nagmamadali si Pangulong Rodrigo Duterte na pangalanan ang iba pang mga opisyal at personalidad na sangkot sa ilegal na droga.
Sinabi ni Presidential Management Staff chief Sec. Bong Go, nais muna ni Pangulong Duterte na makompleto ang listahan para isahan na lang ang pagbanggit ng mga pangalan.
Una rito kamakalawa ng gabi, muling nasentro sa kampanya laban sa ilegal na droga ang mensahe ng pangulo at nabanggit ang Sinaloa drug syndicate.
Inihayag ni Duterte, nasa labas ng bansa at mga foreigner gaya ng mga Chinese, ang bigtime drug lords.
Kaya uunahin daw niyang ubusin ang mga runner o tinyente ng drug lords sa bansa para wala na silang mabentahan at maparalisa ang kanilang operasyon.
Halimbawa ni Duterte, sa barkong nasa karagatan iniluluto ang shabu at inihuhulog malapit sa Filipinas at sasalpakan ng GPS para ma-monitor kung saan mapadpad at saka sasalubungin ng mga alipores.
Nilinaw ni Pangulong Duterte, hindi lamang krisis kundi isang giyera laban sa droga ang kanyang kinakaharap.
Sa nasabing event sa harap ng mga miyembro ng Parish Pastoral Council for Responsible Voting (PPCRV) sa Malacañang, sinabi ng presidente, hindi siya naniniwala na ang sumukong drug users na umaabot sa 700,000 sa buong bansa ay gumagamit lamang ng illegal drugs kundi pushers din.
