HATAW! D'yaryo ng Bayan hatawtabloid.com
BAGUIO CITY – Iniimbestigahan ang hinihinalang kaso ng human trafficking sa isang sikat na hotel sa Camp John Hay, Baguio City.
Ito’y makaraan magsumbong ang tatlong babae sa front desk ng nasabing hotel na ginahasa at pinagamit sila ng ilegal na droga ng dalawang Arabian national.
Base sa inisyal na imbestigasyon, kinuha ang tatlong kababaihan, kabilang ang dalawang menor de edad, upang maging tour guide at babayaran ng P2,000 kada araw.
Ngunit nagulat ang mga biktima nang sila ay gahasain at pinagamit ng ilegal na droga kaya nagsumbong sa management ng naturang hotel.
Sa pagresponde ng mga pulis, narekober sa loob ng kuwarto ng mga dayuhan ang isang kaha ng sigarilyo na naglalaman ng hinihinalang marijuana.
Napag-alaman, lima lahat ang mga dayuhan ngunit nakabalik na sa kanilang bansa ang tatlo sa kanila.
Habang dinala sa Baguio General Hospital and Medical Center ang mga biktima para masuri kung sila ay nagahasa at positibo sa ilegal na droga.
