Karnapers lagot sa batas ni Grace

HUMANDA ang mga karnaper.

Mas pinaigting na parusa ang naghihintay sa mga karnaper ngayong batas na ang panukala ni Senadora Grace Poe na naglalayong supilin ang nasabing krimen.

Makukulong nang 20 hanggang 30 taon ang mapapatunayang guilty ng carnapping sa ilalim ng Republic Act 10883, ang bagong Anti-Carnapping Law.

Kung may karahasan, ang pagkakakulong ay magiging 30 taon at isang araw hanggang 40 taon.

“Umaasa tayong ang bagong batas na ito, kasama ang pinaigting na implementasyon ng ating gobyerno, ay makatutulong upang masawata ang krimen at mabigyan ng kapayapaan ng loob ang mga nagmamay-ari ng sasakyan,” ani Poe, pangunahing sponsor ng naturang batas sa Senado.

Sa ilalim ng batas, ang carnapping ay isa nang non-bailable offense kung ang ebidensiya ng pagkakasala ay malakas.

Parurusahan din ang pagbebenta ng spare parts ng mga karnap na sasakyan.