3 rape suspects tiklo sa anti-drug ops sa Laguna (Sekyu sa UP Los Baños)

ARESTADO ang tatlong guwardiya ng UP Los Baños sa Laguna makaraan akusahan ng panggagahasa ng dalawang babae kabilang ang isang estudyate ng unibersidad.

Ayon sa ulat, magkahiwalay na hinalay ng mga suspek na sina Rodrico Landicho, Roberto Cañete, at Jayve Tayze, ang dalawang biktima na itinago sa pangalang Cathy at Edna.

Ayon kay Cathy, gabi noong Abril 28 habang naglalakad siya sa campus nang tutukan siya ng patalim at pinagsamantalahan ng tatlong guwardiya.

Habang sinabi ni Edna, naglalakad siya sa Brgy. Maahas noong hapon ng Hunyo 14 nang bigla siyang tinutukan ng patalim ng mga suspek at isinakay sa isang sasakyan saka inabuso.

Nahuli ang tatlo sa isang anti-drugs operation ng Los Baños Police nitong Biyernes ng gabi.

Nakuha sa kanila ang ilang baril, fragmentation grenade, balisong at pakete ng shabu.

Habang isinasagawa ang imbestigasyon sa tatlo, nabatid na sangkot sila sa panggagahasa sa dalawang biktima.

Hinikayat ng pulisya ang iba pang naging biktima ng tatlong guwardiya na magtungo sa kanilang tanggapan para magsampa ng kaso.