Pelikulang nagpanalo kay LJ, ‘di man lang naipalabas sa mga sinehan

SI Nora Aunor, tinalo ni LJ Reyes  bilang best actress sa Urian. Si  Jericho Rosales, tinalo naman ni John Lloyd Cruz bilang best actor. Doon sa festival tinalo ni Jericho si John Lloyd para sa parehong mga pelikula. Upset din sinaDennis Trillo at Piolo Pascual na siyang nanalo naman sa Star Awards. Tinalo sila ni John Lloyd, at si Piolo ni hindi nominated sa Urian.

Pinapanalo naman nilang best picture iyong Taklub, pero sa tingin nila mas magaling na director si Jerrold Tarog na siya namang nagdirehe ng Heneral Luna. Upset na naman ang Felix Manalo at si direct Joel Lamangan na siyang choice naman ng Star Awards.

Natural lang iyan. Iba’t iba ang jurors, natural iba’t iba rin naman ang napipili nila. Ang tanong na lang ay sino ba ang mas credible at pinaniniwalaan ng publiko? Ang tanong lang namin, kung magbibigay kaya ng awards ang nagtitinda ng pang-hinuli at bato ng lighter sa Avenida, sino ang mananalo?

Kailan din naman kaya kikita ang mga pelikulang nananalo ng awards? IyangTaklub at iyang pelikulang nagpanalo kay Reyes, ni hindi pa yata iyan naipalalabas sa mga sinehan? Walang commercial screening iyan. Kaya nga sinasabing patay na ang industriya ng pelikulang Filipino.

Mukhang ang mga baguhang film makers ay gumagawa ng mga pelikula para lang manalo ng awards, at hindi iniisip na kumita naman para mabuhay ang industriya.

HATAWAN – Ed de Leon