Sharon, handa na kay Gabby

IPINAGMAMALAKI ng megastar na si Sharon Cuneta sa kanyang social media account na halos 50 pounds na ang nabawas sa kanyang timbang. Talagang pinaghahandaan niya ang pelikulang muli nilang pagtatambalan ni Gabby Concepcion na magsisimula na raw ang shooting sa August.

Matagal na namang nakahanda ang pelikulang iyan. Katunayan nga nasabi na ni Sharon na gagawin niya iyan matapos siyang pumirma ulit ng dalawang taong exclusive contract sa ABS-CBN. Iyon namang balik ni Sharon na iyon sa ABS-CBN, ay walang dudang isang career move para muling sumigla ang kanyang career na parang matagal din namang natulog.

Siguro nga good choice na si Gabby. Kung natatandaan ninyo, iyong unang pelikula ni Sharon ay naging isang napakalaking hit, iyong Dear Heart, at ang leading man niya roon ay si Gabby. Iyong ikalawang pelikula niya, na siyang unang pelikula namang ginawa ng Viva, dahil hindi makagawa ng follow up movie agad ang Sining Silangan noon ay iyong PS I LoveYou, na si Gabby din ang leading man.

Tapos niyon, inihiwalay muna si Sharon kay Gabby, at medyo bumaba ang kanyang career, hanggang sa nilampasan siya ng mga pelikulang bold na nauso noon. Muli kinuha nila si Gabby bilang leading man niya sa Dapat Ka Bang Mahalin, at naibalik si Sharon sa pangunguna sa takilya.

Ngayon na sinasabing matagal na natulog ang career ni Sharon, na nagsimula noong hindi na siya masyadong naging aktibo matapos na isang taong mawala pa, dahil sinamahan niya ang kanyang asawa na nag-aral sa Amerika, siguro nga kailangan ang isang Sharon-Gabby movie ulit.

Pero ang tiyak na itatanong, nariyan pa ba ang napakaraming Sharon-Gabby fans? Baka naman maging parang Nora Aunor lang iyan? Well, ang plano naman ay may isasama raw sa kanila na isang sikat na young love team. Sana ang isama sa kanila ay iyong Jadine.

Dalawa na lang naman iyang naglalaban sa popularidad ngayon, iyong AlDub na hindi naman siguro nila makukuha, at iyong JaDine na nasa kanila na. Iyong ibang mga love team naman kasi nila, parang tagilid ngayon ang popularidad at mahirap isugal kasama sina Sharon at Gabby.

HATAWAN – Ed de Leon