Military na naman sa Bureau of Immigration (BI)?

HINDI happy ang mga taga-Bureau of Immigration (BI) sa kanilang nababalitaan na, magmumula na naman daw sa military ang itatalagang bagong Commissioner.

Kung sino man ang naatasan ni President-elect Digong sa selection process ng mga itatalagang hepe, commissioner, secretary sa iba’t ibang ahensiya ng gobyerno, sana’y rebyuhin niyang mabuti kung sino man ang irerekomendang mga tao.

At please lang po, Mayor Digong, huwag na po kayong magtalaga ng military man na hindi naman angkop sa posisyon, dahil maraming nagkaletse-letse sa Bureau nang italaga riyan ang dalawang magkasunod na military men.

Sabagay mukhang may punto rin naman sila dahil hindi nga naman sila sanay sa klase ng ala-militar na pamamalakad.

Hindi rin naman daw kasi komo military style ang gagawing pagpapatakbo sa kagawaran ay mababawasan na ang alegasyon na may sandamakmak na korupsiyon diyan.

Ang kailangan daw ng Bureau ay isang mamumuno na karespe-respeto at handang makinig sa suggestions lalo na sa hinaing ng mga nakararami.

Knowing the style of the majority of the employees, lalo lang lalabas ang sungay nila kung gagamitan sila ng kamay na bakal.

Hindi naman po combatant in nature ng Immigration. Civilian office po iyan.

Hangad lang po ng mga taga-BI na bumalik ang panahon nina Commissioner Rufus Rodriguez, Didi Domingo, Nonoy Libanan at Al Fernandez at sana po ay ibalik rin ang mga nawala at tila ninakaw na benepisyo sa kanila.

‘Yun lang ho, Mayor Digong.

Ikaw na lang ang nakikita nilang pag-asa para muling maibalik ang nauukol para sa kanila.

Sa katunayan, inip na inip na silang mag-Hunyo 1, 2016.

‘Yun lang po!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com