HATAW! D'yaryo ng Bayan hatawtabloid.com
NAGULAT kami at hindi namin akalain na ganoon na pala karami ang fans ng bagong grupong Voice Male na naglunsad ng kanilang kauna-unahang self-titled album noong Sabado sa Fisher Mall activity center.
Ang Voice Male ay binubuo ng apat na tin-edyer na ang dalawa ay finalists sa isang talent search ng ABSCBN. Ito’y sina Carl Williams Ignacio at Clark Dizon. Si Carl ay graduate ng kursong Electronics and Communications Engineering sa University of the East, Manila at choir member noong hay-iskul. Kasama siya sa grupong Full Force at naging champion sa Eat Bulaga’s singing Dabarkads noong 2009. Si Clark naman ay college graduate rin sa ABE na marami nang commercial ang nilabasan. Dati rin siyang lead vocalist ng grupong Pilyo at grand finalist ng Gandang Lalake ng It’s Showtime.
Dahil sa karisma at pagiging hawig daw ni Kean Cipriano kaya marami ang nahuhumaling kay Darwin Moreto na IT graduate at nakalabas na sa The Ryzza Mae Show, Eat Bulaga, Bubble Gang, Bingit, at Master Showman’s Walang Tulugan.
Ang pinakahuli naman ay si Ron Dales na nagmula sa Pardo, Cebu City na nag-aaral sa Pamantasang Lungsod ng Muntinlupa na kumukuha ng kursong AB Psychology. Choir member ng Sepulcro Parish sa Landayan, San Pedro, Laguna si Ron at na paboritong singer sina Gary Valenciano at Martin Nievera.
Marami nang TV at radio guesting ang grupo pagkatapos ng kanilang album launching.
Dalawa sa limang tracks ng album ay sinulat ng aktres na si Rita Avila, ang isa ay sinulat naman ni Joy Silverio, at ang iba’y isinulat ng grupo. May regular weekly (weekend) mall show ang Voice Male sa The Fisher Mall at maraming out- of-town shows, pageants, fiestas, festivals, at special events.
SHOWBIZ KONEK – Maricris Valdez Nicasio
