Pagkikita nina Alden at Yaya Dub, inaabangan (Lola Nidora, sumugod sa Broadway)

PAGKATAPOS mahimatay ni Yaya Dub (Maine Mendoza) noong Sabado sa #KalyeSerye ng Eat Bulaga!, marami ang naghintay sa muling paglabas nito kahapon.

Subalit bigo ang mga manonood bagamat naintindihan nila ang dahilan ng hindi pagsulpot ng Pambansang Yaya sa noontime show. Marami ang nalungkot dahil hindi nila nasilayan si Yaya Dub. Hinimatay si Yaya Dub noong Sabado habang isinasagawa ang kasal niya kay Yackie. Ang akala ng iba’y scripted ang nangyari, ‘yun pala’y hindi dahil totoong nawalan ng malay si Yaya Dub.

Kahapon, nakita ng televiewers ang pagsugod sa broadway si Lola Nidora para harapin si Alden Richards. Sumugod naman si Alden sa barangay para ibigay ang kanyang mensahe kay Yaya Dub, ang “Pagaling Ka!”

Bagamat wala si Yaya Dub, na-appreciate naman ng viewers ang sobrang effort nina Wally Bayola, Jose Manalo, Paolo Ballesteros, at Alden para mapasaya ang mga nag-aabang sa #KalyeSerye.

Kung kailan magkikita sina Alden at Yaya Dub, ‘yan ang inaabangan ng karamihang sumusubaybay sa #KalyeSerye ng EB. Kahit kami’y excited sa kanilang pagkikita. Tiyak na marami ang matutuwa kapag nagkita na ang dalawa.

SHOWBIZ KONEK – Maricris Valdez Nicasio