HATAW! D'yaryo ng Bayan hatawtabloid.com
IKINASA NG DALAWANG BIGTIME NA APISYONADO ANG SUSUNOD NA LABAN
Naging masigla ang pag-uusap ng dalawang may edad na lalaki sa harap ng imported na alak at pulutang inihaw na baka. Marami silang naging paksa sa mga kwento-kwentohan. At sa dulo’y napagkasunduan ang muling pagtatanghal ng “Matira Ang Matibay” sa pagsapit ng pistang-bayan.
“Magandang ideya ‘yan, Don Brigildo. Sige, paghandaan natin ‘yan…” sabi ni Mr. Rojavilla.
“Cheers!” ani Don Brigildo sa pagtataas ng kopita ng alak sa mga panauhin.
Sa kalagitnaan pa ng taon ang pistang-bayan. Pero naging usap-usapan na agad ng taumbayan ang gayong plano nina Don Brigildo at Mr. Rojavilla.
“Tiyak na mas malaki ang magiging pa-premyo ni Don Brigildo.”
“Pwede raw lumahok ang kahit taga-ibang bayan.”
“Balita ko, tatlong pares ng mga kalahok ang balak pagharap-harapin sa paligsahan.”
“Teka, ano na ang balita kay King Kong? Makakasali pa kaya ‘yun?”
“Ewan… Dalawang araw daw walang malay sa ospital matapos ma-knockout nu’ng Ganador, e.”
“Kawawa naman si King Kong… “
Nakarating kay Rando na hindi iilan ang nalungkot sa naging kapalaran ni King Kong sa ibabaw ng ruweda. Ang hindi niya alam, hindi rin iilan sa mga kabataan sa kanilang bayan ang nag-iyakan nang maospital ito matapos ang kanilang laban. Narinig din niya:
“Pangit man ang panlabas na kaanyuan, e napakaganda naman ng kalooban ni King Kong.”
“Ay, talaga! Hindi biro-biro ang ginagawa n’yang pagmamalasakit at pagkali-nga sa ating mga kabataan.” (Itutuloy)
ni Rey Atalia
