Seguridad sa Kalibo Int’l Airport nalulusutan!

NAKAPANGANGAMBA ang mga bagong pangyayari nitong mga nakaraang linggo sa ating mga pangunahing paliparan sa bansa.

Kaugnay ito ng SEGURIDAD. Of all issues naman talaga — SECURITY pa.

Ngayon pa namang naghahanda ang bansa sa gaganaping Asia Pacific Economic Cooperation (APEC) Summit sa Iloilo International Convention Center (IICC) sa taon na ito.

Ang Kalibo International Airport (KIA) ay isa sa mga airport na magiging abala dahil may bahagi sa programa ng APEC Summit na idaraos sa Boracay Island.

At nakanenerbiyos talagang isipin na mayroong nakapupuslit na pasahero mula sa KIA nang walang kaukulang dokumento pero nakarating pa sa Korean airport.

What the fact!?

Inihayag ng Philippine Airlines (PAL) na nagsasagawa na sila ng internal investigation kaugnay ng insidente.

Habang pinagpapaliwanag na umano ni Kalibo Governor Florencio Miraflores ang Civil Aviation Authority of the Philippines (CAAP) kung bakit nakalusot  ang sinasabing ‘mentally-ill woman’ na sumakay sa PAL flight at nakarating sa Incheon, Korean nang walang kaukulang dokumento.

Ikalawang insidente umano ito na ang nauna ay isa rin umanong babaeng may sayad (excuse me po) na nakarating hanggang rampa pero napigil ni Percy Malonesio, CAAP Western Visayas manager.

E paano kung terorista pala ‘yung babaeng nakarating sa Incheon, Korea sakay ng Philippine flight at nagtagumpay na isakatuparan ang kanyang misyon doon? Patay ang Philippines my Philippines. Tiyak awtomatikong kanselado ang APEC sa Pinas.

Sonabagan talaga!!!

Hindi ba’t kailan lang din ‘e nagkaroon ng order ang Manila International Airport Authority (MIAA) na ang mga Immigration personnel sa lahat ng Airport sa bansa ay limitado na ang lugar na katatalagahan. Hanggang red zone na lang umano sila at hindi na pwedeng umabot hanggang boarding zone.

Ang tanong, paano mado-double check ng Immigration personnel ang mga pasahero?!

Gaya nga niyang nangyari sa KIA?!

Sino ang dapat managot sa insidenteng ito?!

Pakisagot na nga po!