Onemig, natatakot ilayo ang mga anak sa kanya at dalhin sa France

ni Ed de Leon

HINDI na kami nagulat doon sa narinig naming balita na hinihingi ng dating matinee idol na si Onemig Bondoc ang sole custody ng kanyang dalawang anak na babae sa kanyang misis na si Valerie Bariou. Early last year pa namin naririnig na medyo malabo na raw ang kanilang relasyon. In fact bago pa sila naghiwalay, lumabas pa ang TV interview ni Valerie na umaaming may problema nga sila sa kanilang relasyon. Basta ganoong umamin na in public ang isa, malala na ang sitwasyon. Pero nanatiling tahimik si Onemig tungkol sa issue na iyon.

Noong umamin ang kanyang asawa na may problema na nga sila, alam namin most probably hiwalay na nga sila, dahil sino ba naman ang aamin ng ganoon in public kung nagsasama pa at posible pang magkasundo?

Tahimik pa rin si Onemig tungkol sa issue, pero sa palagay namin umaasa pa rin kasi siya na alang-alang sa kanyang mga anak ay baka may mapagkasunduan silang mga bagay. Pero siguro nga hindi na sila umabot sa anumang kasunduan, at kagaya ng madalas na epekto ng paghihiwalay, may isang partido na hindi nagkakaroon ng panahong makasama ang kanilang mga anak kaya hayun na si Onemig at humarap na sa korte para hinging ibigay sa kanya ang sole custody ng kanilang dalawang anak.

Sa ilalim ng ating mga batas, kung ang mga bata ay maliliit pa, pinapaboran ng korte na mamalagi silang kasama ng kanilang ina. Kung may sapat na isip na sila, tinatanong sila kung kanino nila gustong sumama. Sa kaso ni Onemig, dayuhan si Valerie, at maaari niyang sabihin na mas matututo ng Filipino values ang kanyang mga anak kung nasa kanya. Isa pa, may posibilidad na umuwi si Valerie sa France at dalhin ang kanilang dalawang anak. Iyan siguro ang mga batayan ni Onemig kaya niya hinihingi ang sole custody ng kanyang mga anak.

Kasal din sila ni Valerie sa sibil. Palagay namin iyan naman ang susunod nilang aayusin.