Trike driver tigok sa sarap

HINDI na umabot nang buhay sa pagamutan ang isang tricycle driver makaraan atakehin sa puso habang nakikipagtalik sa isang babae sa loob ng isang motel sa Malolos City kamakalawa ng gabi.

Kinilala ang biktimang si Felicisimo Tolentino, 59, residente ng Wawa St., Brgy. San Sebastian, bayan ng Hagonoy, sa naturang lalawigan.

Ayon sa imbestigasyon ng Malolos City Police, nag-check-in si Tolentino kasama ang isang hindi nakilalang babae sa Busy Homes Apartelle.

Nang malapit nang matapos ang oras na kinuha ng biktima, kinatok ng roomboy ang kwarto ng dalawa ngunit walang sumasagot kaya sapilitang binuksan.

Sa puntong ito, bumulaga sa kanila ang biktima na walang malay habang nakahiga sa kama ngunit wala na sa kwarto ang kasama niyang babae.

Isinugod ang biktima sa pinakamalapit na pagamutan sa lungsod ngunit idineklarang dead-on-arrival ng mga manggagamot. Pinaniniwalaan ng pulisya na tumakas ang babae at iniwan ang biktimang hinihinalang inatake sa puso habang kainitan ng kanilang pagtatalik.

(MICKA BAUTISTA)