ISANG lider ng kulto na may nakabinbing arrest order ang naaresto ng Tampakan PNP sa Tampakan, South Cotabato.
Si Jessie Dayo Casianares, lider ng Alpha Omega Mathematical Mission, residente ng Purol Rizal, barangay Kipalbig, Tampakan ay naaresto sa bulubunduking sakop ng Sitio Data’l Bla, Barangay Lampitak.
Ayon kay Sr. Insp. Sherwin Maglana, hepe ng Tampakan PNP, ay inaresto sa bisa ng warrant of arrest na inilabas ni Judge Lorenzo Balo, ng Koronadal Regional Trial Court (RTC) Branch 24.
Si Casianares ay kinasuhan ng paglabag sa Republic Act 9262 o Anti-Violence Against Women and Their Children Act ng kanyang asawa dahil sa hindi pagbibigay ng suporta sa mga anak at pagkakaroon ng tatlong asawa.
Napag-alaman na may 10 taon nang nasa bundok ang grupo ni Casianares kasama ang mahigit 10 pamilya na kasapi ng kanyang kulto na karamihan ay mga babae.
Nakapagtayo na rin si Casianares ng kanyang sariling simbahan sa bundok at maliit na silid para sa kanyang panggagamot.
(Beth Julian)
