HATAW! D'yaryo ng Bayan hatawtabloid.com
NAIINTINDIHAN ko ang layunin ni Ang Mata Aalagaan (AMA) party-list representative Lorna Velasco sa paghahain niya ng panukalang batas – House Bill 3979 o Bottled Water Bill – na nag-aatas sa mga food establishment na isama umano sa kanilang menu ang pag-aalok ng bottled water (purified, mineral o distilled).
Sana ang ibig sabihin dito ni Congresswoman ‘e magsilbi ng LIBRENG ‘malinis’ na tubig ang mga food establishment.
‘E sa totoo lang meron naman talagang itinitindang bottled water sa mga food establishment.
Ang dapat sigurong ipanukala ninyo Congresswoman Velasco, dapat magsilbi NANG LIBRENG bottled water (purified, distilled o mineral) ang mga food establishment.
Sa totoo lang, napakamahal ng bottled water sa mga food establishment.
Kung bumibili tayo ng purified or distilled water sa mga water station sa halagang P35 to P65 per 5-gallon, ang mga bottled water na kadalasan ay 375 to 500 ml lang ay nagkakahalaga ng P25 hanggang P60 sa mga restaurant o food establishments.
Sa mga high-end food establishments nga ‘e nagkakahalaga pa ng P120 per 500 ml.
O grabe ‘di ba?!
‘Yun dapat ang itulak ng pamahalaan ngayon.
Kung gusto ni Congresswoman Velasco na isabatas ‘yan sana ay bilang proteksiyon sa mamamayan na kung sino o alin man food establishments ang lumabag ay dapat parusahan.
Mantakin ninyo, napakayaman ng bansa natin sa water resources, tapos dumaan lang sa proseso ‘e napresyohan na nang napakamahal?!
Hindi ba’t tungkulin ng food establishments na maglaan ng malinis na tubig (purified, distilled o mineral) sa mga customer nila?!
Huwag na po natin pagastusin ang TAONG BAYAN sa mga batas na hindi naman magbibigay ng proteksiyon sa kanila!
Ang malinis na tubig (bottled mineral, purified or distilled water) ay dapat isilbi ng mga may-ari ng food establishments sa kanilang costumer.
Nagbayad na nga sa kinain sa restoran nila pati ba naman malinis na tubig may bayad pa!?
‘Yun ‘yon!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
