Level ng pagka-aktres ni Angel, nabago nang makasama si Ate Vi

NATAWA kami nang bumeso sa amin si Angel Locsin na nagulat yata na pinahinto namin ito at piniktyuran.

“Parang bago? Akala mo hindi naman tayo laging nagkikita,” nakangiting sey nito sa amin sa tila kakaiba ngang pagrampa niya sa red carpet na inihanda ng Star Cinema for them.

“Ikaw na ang makasama ni Ate Vi,” simpleng tugon namin, sabay taas ng kanyang dalang bouquet of flowers.

Isa na nga ito sa maituturing ni Angel na mahalagang movie niya to date. Sa mga previous talk namin sa kanya, nag-iba nga raw ang level ng kanyang pagka-aktres in many sense dahil sa Everything About Her.

“Paano kasi kahit sa set lagi kaming in character dapat. Requirement ni direk, bawal ang sobrang tsismisan,”  natatandaan naming pahayag nito sa amin noong minsan naming makatsikahan ito.

Nerbiyos na nerbiyos nga siya dahil ang Star For All Season nga ang kanyang kasama at first time din niya with direk Joyce Bernal na inilarawan niyang sobrang dedicated at mabusisi.

Pero lahat naman daw ‘yun ay worth ng kung anuman dahil sa rami ng bago niyang natututuhan, alam daw niyang hindi pa sapat ang kanyang pagiging Angel Locsin.

Imagine nga naman na pati ang pagturok ng injection, pagkuha ng blood pressure at iba pa ay bahagi lang ng pangangarir na pinag-aralan at ginawa niya para mas maging effective nurse-care giver niya sa movie.

AMBETIOUSLY – Ambet Nabus