Amok nanaksak sa PCP, todas sa parak (2 pulis sugatan)

PATAY ang isang hindi nakilalang lalaki makaraan barilin ng isang pulis nang mag-amok at saksakin ang dalawang parak sa loob ng police station sa Binondo, Maynila kamakalawa ng gabi.

Hindi na umabot nang buhay sa Gat Andres Bonifacio Hospital ang lalaking may gulang na 40 hanggang 45-anyos, 5’10 haggang 5’11 ang taas, malaki ang pangangatawan, kalbo at nakasuot ng itim na short pants.

Habang nilalapatan ng lunas sa Jose Abad Santos Hospital sina PO1 Jerus Gonzales dahil sa saksak sa leeg, at PO1 Mark Osit, dahil sa sugat sa mukha at leeg, pawang nakatalaga sa Manila Police District (MPD) – Escolta Outpost.

Sa report ni Det. Milbert Balinggan ng Manila Police District (MPD)-Homicide Section, dakong 11:45 p.m. nang maganap ang insidente sa loob ng MPD-Escolta Outpost sa panulukan ng Escolta St., malapit sa Quintin Paredes St., Binondo, Manila.

Nauna rito, naka-duty ang nabanggit na police officers nang pumasok ang lalaki at nagpanggap na magrereklamo ngunit pagkaraan ay naglabas ng patalim at sinugod ng saksak ang dalawang pulis.

Bunsod nito, bumunot ng baril ang isa sa mga pulis at pinatukan ang lalaki.