Chief investigator sa CamSur itinumba (Sa mismong kaarawan)

NAGA CITY – Matagal nang alitan ang itinuturong dahilan sa pagpaslang ng isang Cafgu sa isang pulis sa Brgy. Amokpok, Ragay, Camarines Sur kamakalawa.

Kinilala ang biktimang si SPO2 Julieto Mondigo Jr., chief  investigator ng PNP-Ragay.

Ayon kay PO3 Roberto Dela Torre, papunta ang pulis sa himpilan upang imbitahan ang kanyang mga katrabaho sa kanyang birthday celebration nang harangin siya ng aktibong Cafgu member na si Ramon Begino.

Nang akmang bubunutin ng suspek ang kanyang kalibre .45 baril, sinubukan ng biktimang agawin ang baril upang hindi maiputok.

Dito nagkaroon ng pagkakataon ang biktima na tumakbo papalayo ngunit hinabol siya ng suspek saka pinagbabaril.

Nang bumagsak ang biktima, lumapit ang suspek, kinuha ang baril ni Mondigo na 9mm at pinagbabaril pa nang limang beses sa kanyang mukha ang pulis.

Mabilis na tumakas ang suspek ngunit dahil may mga nakakita sa pangyayari. Pinaghahanap na ngayon ng mga awtoridad ang suspek.

Nabatid na ika-46 kaarawan sana ng biktima kamakalawa nang siya ay paslangin.