Pananagutan ni PNoy sa SAF 44 patutunayan ni Enrile

NAIS patunayan ni Senator Juan Ponce Enrile kung bakit responsable si Pangulong Benigno Aquino III sa pagkamatay ng 44 miyembro ng Special Action Focre (SAF).

Sa muling pagbukas ng Mamasapano probe sa Enero 27, “ipapakita ko nang maliwanag kung ano ang nangyari sa operasyon” at kung bakit “ultimate responsible” ang pangulo sa madugong operasyon.

Aniya, inimbitahan niyang dumalo sa pagpupulong para sa pagsisiyasat, sina Executive Secretary Paquito Ochoa, Defense Secretary Voltaire Gazmin, dating Philippine National Police chief Alan Purisima, dating Armed Forces of the Philippines chief Gregorio Pio Catapang, dating Interior secretary Mar Roxas, dating PNP officer-in-charge Leonardo Espina at Social Welfare Secretary Dinky Soliman.

Aniya, itatanong niya ang mga katanungan na kanyang isinumite noong nakaraang taon sa unang pagdinig ng kaso na hindi ginamit ng kanyang mga kapwa senador.

Nais rin niyang maliwanagan kung ano ang rason sa pagpunta ng pangulo sa Zamboanga City noong Enero 25, 2015.

Aniya, “May importanteng official business ba siya sa Zamboanga upang iwanan ang family affair na iyon na tungkol sa nanay niya?”

Dagdag ni Enrile, “Ngayon noong nandoon na siya sa Zamboanga, alam ba niya ang nangyayari? Wala siyang imik e. Palagay ko naman ang taumbayan gustong malaman iyon.”

Una nang sinabi ni Aquino na may bahid ng paghihiganti at “politically-motivated” ang muling pagbukas ng kaso dahil galit sa kanyang administrasyon si Enrile.