RH fund sapat kahit may budget cut — Palasyo

PINAWI ng Malacañang ang pangamba ng maternal health at Reproductive Health (RH) Law advocates kaugnay sa pondong pang-contraceptives na sinasabing tinapyas ng Kongreso sa 2016 national budget.

Magugunitang sinisisi ni Health Sec. Janette Garin si Sen. Tito Sotto na nagpatanggal sa P1 bilyong alokasyon ng DoH para sa pambili ng condoms at pills.

Sinabi ni Communications Sec. Sonny Coloma, batay sa paliwanag ni Budget Sec. Butch Abad, hindi buong P3,137,872,000 na panukalang pondo para sa family planning program ng DoH ang tinanggal ng Kongreso, bagkus may P2,275,078,000 inaprubahan kaya nasa P862,794,000 lamang ang aktwal na nabawas.

Ayon kay Coloma, pinatanggal lamang ni Sotto ang nasabing pondong nakalaan para sa Implanon implant dahil sa temporary restraining order (TRO) ng Korte Suprema laban sa distribusyon at pagbebenta ng nasabing contraceptive.

Kaya giit ni Coloma, mayroon pang halaga na maaaring gugulin para sa family planning bukod pa sa savings noong nakaraang taon na maaari pa rin gugulin ng DoH.