TRO sa DQ cases ni Sen. Poe pinagtibay ng SC

PINAGTIBAY ng Supreme Court (SC) en banc ang dalawang temporary restraining order (TRO) sa disqualification cases laban kay Sen. Grace Poe.

Sa ginawang en banc session, bumoto ang mga mahistrado, 12-3, para pagtibayin ang TRO na inilabas ni Chief Justice Ma. Lourdes Sereno noong Disyembre 28, 2015 para kay Poe.

Nangangahulugan itong hindi pa maaaring tanggalin ng Commission on Elections (Comelec) ang pangalan ni Poe sa listahan ng official candidates.

Kasabay nito, pinagbigyan ng Korte Suprema ang hirit ng kampo ni Poe na pag-isahin na lamang ang dalawang disqualification cases laban sa kanyang pagkandidato bilang pangulo sa 2016 elections.

Habang ipinagpaliban ng kataas-taasang hukuman ang oral argument na itinakda sa Enero 19 at iaanunsiyo na lamang kung kailan ang bagong schedule.

Ang oral argument ay kaugnay sa petisyon ng natalong senatorial candidate na si Rizalito David na kumukuwestiyon sa ruling ng Senate Electoral Tribunal (SET) na isang natural-born Filipino citizen si Poe.