Iringan nina Bautista at Guanzon sa DQ case ni Sen. Poe tumitindi

LALO pang tumindi ang bangayan nina Comelec Chairman Andres Bautista at Commissioner Rowena Guanzon kaugnay ng inihaing tugon sa Supreme Court (SC) para sa isyu ng disqualification ni Sen. Grace Poe.

Bukod kina Bautista at Guanzon, ilang persona ang nagbigay ng panig sa sinasabing walang pahintulot na paghahain ng commissioner ng comment sa kataas-taasang hukuman.

Ayon sa tagapagsalita ni Poe na si Valenzuela Mayor Rex Gatchalian, hindi dapat dinadala sa publiko ang isyung dapat na pinagtatalunan lamang sa loob ng poll body.

Habang kinampihan ng legal expert na si San Beda College of Law dean Ranhilio Aquino si Guanzon sa pagsasabing ang Comelec ay collegial body at ang commissioners ay hindi subordinate ng chairman.

Una rito, binigyan ng memo ni Bautista ang lady poll official dahil inihain daw ang comment sa SC nang wala siyang lagda.

Kung mabibigo raw si Guanzon na maipaliwanag ang bagay na ito ay maaari niyang hilingin sa Korte Suprema na ipawalang saysay ang komentong isinumite dahil hindi iyon sinang-ayonan ng buong commission en banc.

Ngunit tugon ni Guanzon, walang karapatan ang Comelec chief na sabihing walang authority ang inihain nilang comment.