3 batang mag-uutol minasaker sa Batangas

MINASAKER ang tatlong batang magkakapatid sa isang apartment sa Lipa City, Batangas at natagpuan ang kanilang bangkay dakong 8 a.m. kahapon.

Ayon kay Lipa City police chief, Superintendent Carlos Barde, ang mga biktima na edad 10, 8, at 7 ay pinatay sa pamamagitan ng pagpalo ng matigas na bagay.

Iniwan ang mga bata ng kanilang lola dakong 1:30 a.m. upang bantayan ang kanyang tindahan sa public market na 200 metro lamang ang layo mula sa apartment sa San Nicolas Street, Brgy. Balintawak.

Batay sa inisyal na imbestigasyon, may isang lalaki na umalis ng apartment dakong 3am.

Sinasabing niransak ang apartment ngunit walang mahahalagang bagay na nawala.

Sa ngayon, bumuo na ng special probe team ang pulisya para imbestigahan ang insidente.