3-anyos paslit ginilitan sa leeg ng ama

DAGUPAN CITY – Hindi makapaniwala ang pamilya na gigilitan sa leeg ang 3-anyos paslit ng kanyang sariling ama sa Cabanatuan, Nueva Ecija kamakalawa.

Nais nilang mabulok sa kulungan ang suspek makaraan ang tangkang pagpatay sa bata.

Napag-alaman, nasa ibang bansa ang ina ng paslit habang nasa poder ng kanyang mga magulang ang mga anak.

Una rito, binisita lamang ng suspek ang mga anak sa bahay ng kanyang biyenan na kanya pang nakainoman.

Ngunit laking gulat na lamang nila nang marinig ang pag-iyak ng paslit na natagpuang nakadapa sa sahig habang ginigilitan sa leeg ng suspek gamit ang karit o gapas ng palay.

Nasugatan ang kamay ng lolo ng paslit makaraan awatin ang suspek sa ginagawa.

Inaalam ng mga awtoridad kung gumagamit ng droga ang suspek na agad naaresto makaraan ang insidente.