Alex, ‘di nakatutulong para mag-rate ang PBB All In

ni Reggee Bonoan

MUKHANG walang susunod sa yapak nina Kim Chiu, Gerald Anderson, Melai Cantiveros, Jayson Gainza, Robbie Domingo, at Zanjoe Marudo sa housemates ng Pinoy Big Brother All In dahil wala raw silang mga karakter.

Base ito sa pahayag ng nakatsikahan naming taga-ahensiya na ilang gabi rin nilang pinapanood ang PBBAI pero wala raw markado.

“Eh, kasi sina Kim at Gerald, kita mo naman, sikat na sikat na at saka noong nasa loob sila ng PBB, kitang-kita mo na may karakter, si Kim that time, kumakanta-kanta pa, si Gerald, alam mo ng leading man material.

“Sina Melai naman, kita mo naman ‘di ba, riot sila ng napangasawa niya noon dahil parati silang may isyu tapos doon din nabuo ang loveteam nila hanggang in real life na.

“Si Jayson din, kita mo naman, magaling na komedyante, marami siyang shows ‘di ba? Si Zanjoe naman, well kita mo, leading man na ng mga sikat at nagsosolo movie na. Si Robbie, magaling na host,” paliwanag sa amin.

Sabi pa, “napanood mo ba ang ‘PBB All In’? Walang big story, hindi nakatutulong sina Alex (Gonzaga) kasi nag-mellow siyang bigla, sana ilabas niya ang pagiging makulit niya kasi iyon ang gusto ng tao kaya nga siguro siya inilagay doon kasi kita mo naman, walang nangyayari. Si Daniel (Matsunaga) naman, wala rin, parang display lang ang katawan.”

Sabagay, sa ilang gabi rin naming nasisilip ang Pinoy Big Brother All In ay nabo-bore kami kaya mas ginusto pa naming manood na lang ng pelikula.

Samantala, malakas sa social media si Manolo Pedrosa kaya tinanong namin ang taga-ahensiya na posibleng siya ang manalo at sisikat pagdating ng araw.

Pero ang sagot sa amin, “one of those, wala pang masyadong ipinakita. Siguro kailangan niyang gumawa ng kakaiba.”