HATAW! D'yaryo ng Bayan hatawtabloid.com
PUSH NA’YAN
ni Ambet Nabus
MARAMI naman ang nagtataka kung bakit binura o tinanggal ni Bong Revilla ang nai-post niyang pasasalamat hours after nang bilangan sa pagka-senador na nasa ika-14 na puwesto nga lang siya.
Sa naturang post ay buong giting nitong tinanggap ang resulta at nagpasalamat nga sa sambayanan dahil mukha ngang hindi na aakyat pa sa Top 12 ang kanyang posisyon kaya’t bigo siyang magkaroon ng ikalawang termino sana.
“Bakit nawala? Bakit tinanggal?,” tanong ng netizen at mga supporter niya na kahit nasaktan daw sa sinapit ni Bong sa karir nito sa politika ay naniniwalang may 2028 pa na susunod na halalan.
Talaga lang daw na naging mahigpit ang laban at umiral ang mga laro sa politika na masasabing nag-pokus sa negatibong aspeto ng mga kandidato, imbes na sa magagandang nagawa nito.
“Hindi na nakawala o naalis sa isipan ng mga tao ang minsang pangyayari sa buhay ni Bong nang makulong ito. Pinagbayaran na niya, nagdusa na siya at gumawa ng mga magagandang bagay para sa sambayanan pero….” ang tila may hinanakit na litanya ng kanyang mga supporter.
