HATAW! D'yaryo ng Bayan hatawtabloid.com
NAGPAHAYAG nang buong suporta ang mga opisyal ng barangay mula sa iba’t ibang panig ng bansa para sa tumatakbong Senador na si Rodante Marcoleta, dahil sa kanyang matatag na adbokasiya para sa pagpapalakas ng pamahalaang lokal, partikular rito
ang House Bill 9400.
Layunin ng House Bill 9400 na bumuo ng Barangay Affairs and Development Fund mula sa 3-4% ng mga hindi nagagamit o ‘natutulog’ na pondo ng iba’t ibang ahensiya ng gobyerno. Ang pondong ito ay direktang ilalaan para sa mga barangay, lalo sa mga nasa 4th at 5th class municipalities na patuloy na nahaharap sa matinding kakulangan sa pondo.
Ayon sa isang pag-aaral, tinatayang 12% lamang ng halos 42,000 barangay sa buong bansa ang may kakayahang mag-operate nang tuluy-tuloy. Karamihan ay nahihirapan dahil sa mababang honoraria ng mga opisyal at kulang na suporta para sa mga frontline
personnel gaya ng mga tanod, barangay health workers, at miyembro ng Lupon Tagapamayapa.
Dahil dito, nalilimitahan ang kanilang pagbibigay ng serbisyong panlipunan at humihina ang lokal na pamamahala.
Sa layuning tugunan ang mga kakulangang ito, umani ng malawak na suporta sa grassroots level ang HB 9400. Nakapaloob din sa panukala ang pagtatatag ng Barangay Affairs and Development Commission na mangangasiwa sa makatarungang distribusyon ng pondo, pag-standarize ng suweldo ng mga opisyal ng barangay, at pagbibigay ng pangmatagalang pagsasanay at kapasidad.
Ang mas malawak na adbokasiya ni Marcoleta sa batas—na nakatuon sa episyente at makataong pamahalaan, at pagbibigay-kapangyarihan sa mga nasa laylayan — ay lalo pang nagpapatibay sa tiwala ng mga lider-barangay.
Para sa marami sa kanila, ang pagkakaroon ni Marcoleta ng puwesto sa Senado ay mahalagang hakbang para maisakatuparan ang matagal nang inaasam na reporma sa lokal na pamahalaan.
Inaasahang magreresulta ang malawakang suporta ng mga barangay sa solidong boto mula sa mga pamayanang ito sa darating na halalan, dala ng paniniwalang mahalaga ang mga panukala ni Marcoleta para sa mas matatag at mas responsableng lokal na
pamahalaan. (HNT)
