MTRCB ratings ng 8 pelikula sa MMFF inilabas

NATAPOS na ng Movie and Television Review and Classification Board (MTRCB), sa pangunguna ni Chairperson at CEO Lala Sotto ang pagrerebyu ng walong opisyal na pelikulang kalahok sa 2025 Metro Manila Film Festival (MMFF).

“Patunay ito ng aming dedikasyon at matibay na suporta sa mga lokal na pelikula sa pamamagitan ng pagbibigay ng angkop na klasipikasyon,” ani Sotto.

Karamihan sa walong pelikula ay nakatanggap ng G at PG, na nangangahulugang maaari itong mapanood ng mga bata basta’t may kasamang magulang o nakatatanda.

Ang romantic film na I’m Perfect, na idinirehe ni Sigrid Bernardo mula Nathan Studios, ay nakakuha ng G rating, na ibigsabihin, bagay sa lahat ng edad. Umiikot ang kuwento sa romantikong relasyon ng dalawang tao na may Down syndrome.

Ang comedy-drama na Bar Boys: After School, na sequel ng 2017 Bar Boys, ay rated PG. Tampok sina Carlo Aquino, Rocco Nacino, Enzo Pineda, at Kean Cipriano, sa direksiyon ni Kip Oebanda ng 901 Studios Inc. Tungkol ito sa kinahinatnan ng mga karakter pagkatapos ng kolehiyo. Ang PG rating ay nagpapahintulot sa mga edad 13 pababa basta kasama ang magulang o nakatatanda.

PG din ang rating ng Call Me Mother nina Vice Ganda at Nadine Lustre.

Ang Love You So Bad ay nakakuha rin ng PG rating na idinirehe ni Mae Cruz-Alviar at tampok sina Will Ashley, Dustin Yu, at Bianca De Vera. Co-produced ito ng ABS-CBN Film Productions, GMA Pictures, at Regal Entertainment. Umiikot ang kuwento ng isang dalagang nalilito kung sino ang pipiliin sa dalawang binata.

Rated PG din ang thriller na Manila’s Finest, na pinagbibidahan nina Piolo Pascual, Enrique Gil, Romnick Sarmenta, Ariel Rivera, at Joey Marquez na idinirehe ni Raymond Red. Nakasentro ito sa grupo ng mga pulis sa Maynila noong 1969.

Nakakuha naman ng PG ang Rekonek, na pinagbibidahan nina Gerald Anderson, Bela Padilla, Andrea Brillantes, Charlie Dizon, Zoren Legaspi, Carmina Villarroel, Cassy Legaspi, Mavy Legaspi, at Gloria Diaz.

Ang Unmarry, na pinagbibidahan nina Angelica Panganiban at Zanjoe Marudo, at idinirehe ni Jeffrey Jeturian sa ilalim ng Quantum Films at Cineko Films, ay rated PG din. Tinutukan ng pelikula ang kuwento ng mag-asawang masalimuot na pinoproseso ang pagpapawalambisa ng kanilang kasal.

Samantala, ang horror anthology na Shake, Rattle and Roll: Evil Origins, na podyus ng Regal Entertainment at ika-17 sa naturang serye, ay rated R-13 na para sa edad 13 at pataas. 

Hinimok ni Sotto ang pamilyang Filipino na suportahan ang lahat ng pelikulang kalahok sa MMFFngayong Kapaskuhan at binigyang-diin na ang bawat kalahok ay nag-aalok ng kakaibang karanasan na nagpapakita ng yaman ng pagkamalikhain nating mga Filipino.