Coco pag-isipang mabuti pagpasok sa politika

HATAWAN
ni Ed de Leon

KINUKUMBINSI raw ni Lito Lapid si Coco Martin na pumasok sa politika. Paanong papasok si Coco sa politika? Magagawa ba niyang iwanan ang taping ng Batang Quiapo para magkampanya? Ang masakit doon hindi lang naman artista si Coco sa Batang Quiapo, katulong din siya sa pagbuo ng kuwento, pagsulat ng script, at pagdidirehe pa ng serye. 

Kung siya naman ay manalo, bilang senador din halimbawa, paano na rin ang career niya eh tatlong beses sa isang linggo ang sesyon sa senado bukod pa sa mga hearing na ginagawa? 

Okey lang iyon sa mga kagaya nga ni Lito o ni Robin Padilla na hindi na rin naman masyadong in demand at wala na halos ginagawang pelikula.eh si Coco ng daming on going projects. Kaya malamang na mapabayaan din niya ang kanyang tungkulin kung manalo man siya, o mapabayaan naman niya ang kanyang career na mas malaki ang kita niya.

Maganda ngang example ang sinasabi ni Vilma Santos, noong panahon na mayor siya ng Lipa at gobernador ng Batangas. Napansin niya na mas malaki ang binabayarang tax ni Luis Manzano kaysa kanya. Kaya kahit na matagal na ring hinihikayat iyong kumandidato, pinipigil ni Ate Vi at sinasabing, “handa ka na bang mawala ang malaking bahagi ng kinikita mo?” Ganyan din ang sinabi ni Ate Vi noon kay Ai Ai delas Alas na nag-ambisyong maging mayor ng kanilang bayan, sa Batangas din.

Ang payo ni Ate Vi, “ikaw ang comedy queen sa ngayon. Magagawa mo bang talikuran ang malaking kita sa iyong mga pelikula at tv show at malamang mai-abono mo pa ang sarili mong pera para sa mga proyektong gagawin mo? Kung hind pa mag-isip ka muna.”

Nasasabi iyon ni Ate Vi dahil nangyari sa kanya. Milyon ang kita niya sa bawat pelikula. Milyon din ang kita niya noon sa kanyang tv show. Pero lahat iyon ay nawala nang maging mayor siya, at lalo na nga nang maging gobernador ng lalawigan. Noon ang nangyayari pa, kung may proyektong kailangang isagawa agad at walang pondo sa kapitolyo, magpapaalam siya sa Kapitolyo na gagawa muna ng pelikula, para makakuha ng pampondo sa proyekto nila. 

“Akala lang nila masarap ang buhay ng isang public servant. Hindi hoy maliban na lang doon sa mga nagwawalanghiya sa puwesto. At iyong kinikita ko sa Kapitolyo, maibibigay mo rin sa mga humihingi ng tulong sa iyo sa araw-araw. Kulang pa. Mabuti may asawa naman akong siyang gumagastos ng lahat ng kailangan sa bahay namin. Kung hindi paano na? Ni wala akong pangsuweldo sa driver at sa mga kasambahay namin,” ani Ate Vi.

At iyan ang isang bagay na kailangang isipin din ni Coco. Sa ngayon ay napakataas ng kanyang career, napakalaki rin ng kanyang kinikita, kaya ba niyang isakripisyo ang lahat ng iyon?

Kung kami si Coco, tutal bata pa naman, ‘wag nang pumasok sa politika. Kung matanda na siya at hindi na masyadong busy at napaghandaan na rin niya ang kanyang kinabukasan at ang kinabukasan ng kanyang mga anak at saka na siya mag-isip.

Kung ngayon siya papasok sa politika, baka maging mga kaibigan din niya sina Mary Grace Piatos, Fenando Tempura, at Carlos Miguel Oishi.