Alex ibinandera 14M subscribers sa YT

MA at PA
ni Rommel Placente

BONGGA ang vlogger, TV host, at aktres na si Alex Gonzaga dahil mayroon na siyang 14 million subscribers sa YouTube. Talagang sikat na sikat na ang bunsong anak ni Mommy Pinty. Well-followed talaga siya sa social media.

Sa Instagram, ibinandera ni Alex ang ilang pictures niya na nasa beach, pati na rin ang screenshot ng homepage niya sa nasabing video-sharing platform.

“Hi netizens. Two days before I celebrate the 7th year of my youtube channel, we reached 14M!” caption niya sa post.

Wika pa niya, “Malayo na pero malayo pa! Mahal ko kayo.”

Sa Instagram Story naman, lubos siyang nagpasalamat sa lahat ng kanyang fans na sumuporta at tumulong para makamit itong achievement.

“Mahal ko kayo, netizens. Ginapang natin ‘to [nang] magkakasama,” sambit niya.

Ilan lamang sa mga nagpaabot ng “congratulatory” message kay Alex  ay ang mga bigating personalidad na sina Karen Davila at Sen. Loren Legarda na naka-collaborate din niya sa videos.

Ang YouTube channel ni Alex ay inilunsad noong July 19, 2017 at mula niyan ay marami na siyang itinampok na kapwa-artista at content creators.

Taong 2018 naman nang makatanggap si Alex ng Gold Play Button reward mula sa YouTube dahil nalampasan niya ang isang milyong subscribers.

Taong 2019, mayroon na siyang five million subscribers.

At taong 2021 ay umaani na si Alex ng mahigit one billion views at 11 million subscribers.