Snatching, tambay at kung ano-ano pa nakasisira sa imahe ng isang high end mall

HATAWAN
ni Ed de Leon

NAKITA ba ninyo iyong video na ipinost ng Korean football player ng dalawang matabang babae na umano ay nagnakaw ng kanyang wallet? Kinukunan niya ng video ang dalawa habang hinahabol niya dahil kinuha nga ang kanyang wallet. Pero mas mabilis na tumakbo ang dalawang matabang babae at nang may magdaang shuttle bus, mabilis na tumakbo ang dalawa, sumabit sa bus para maiwasan ang dinukutan nila.

Nakasisira iyan ng image ng BGC. May isa pa roon sa may lugar ng Uptown doon sa harapan ng isang bar doon kung gabi ang daming nakaistambay na mga kabataan. Nag-iinuman at pakalat-kalat sa bangketa lamang. Hindi mo malaman kung sila ay customer ng bar na iyon o mga istambay lamang.

Nagbibigay din sila ng maasamang image sa lugar dahil sinasabi ngang marami sa mga iyon ay mga pick up girl o mga “car fun boys’ din. Ibig sabihin, mga babaeng sumasama kung may magkaka-interes sa kanila at mga lalaking napi-pick up din ng mga bakla at matrona.

Kaya nga  kami bihira na rin diyan sa BGC hindi gaya noong araw na bago mag-pandemic na riyan kami madalas na bumibili at naghahanap ng aming mga kailangan.

Ngayon bukod sa matinding traffic medyo sumasama na nga ang image nila hindi mo na masasabing makakapamasyal ka nang panatag ang loob mo.