HATAW! D'yaryo ng Bayan hatawtabloid.com
HATAWAN
ni Ed de Leon
HINDI kami nagulat sa sinabi ni Joshua Garcia na ang una niyang showbiz crush talaga ay si Kathryn Bernardo. Bakit nga hindi eh talaga namang maganda si Kathryn. Iyon nga lang nang mapasok siya sa showbiz syota na ni Daniel Padilla si Kathryn at nagkataon pang magkakaibigan sila. Pero siguro kung hindi nga syota ni Daniel si Kathryn at naligawan din ni Joshua, baka naging mas ok siya kaysa naman sa naging syota siya ni Julia Barretto na bigla na lang siyang iniwan nang may makitang iba.
Matagal din naman bago nakabawi si Joshua matapos silang mag-split ni Julia. Siguro hindi naman niya matanggap agad ang masakit na katotohanan na ipinagpalit siya niyon sa iba. Obvious naman kasi na magsyota pa sila nang magkasama sa pelikula sina Gerald Anderson at Julia, at kahit na ikinaila nila noong una, naging magsyota na sila noon pa at nasagasaan na nga hindi lamang si Joshua kundi si Bea Alonzo rin.
Iyong controversy ni Bea, naging maingay nga, pero si Joshua piniling manahimik na lang at hindi na gumawa pa ng issue dahil sa nangyari sa kanila.
Natanggap naman niya ang katotohanan na talagang nangyayari ang ganoon at wala ngang mas mabuting gawin kundi mag-move on na lang. Iyon nga ang kanyang ginawa at mas nakabuti naman sa kanya. Mas gumanda ang takbo ng kanyang career, mas tumaas pa ang kanyang popularidad.
Minsan naman ganoon eh, may dumarating na hindi maganda sa buhay ng isang tao, at tapos ay may dumarating din namang mas maganda para sa kanya. Sana nga lang magpatuloy na ang ganyang buhay para kay Joshua. Darating din ang isang araw na siguro nga mas magiging matibay ang kanyang lovelife at lalong magiging ok ang kanyang career.
