Bea Alonzo banned sa ABS-CBN?

HATAWAN
ni Ed de Leon

MARAMI ang nakapansin sa ginawang coverage ng TV Patrol doon sa rehearsal ng stage play na Larawan, hindi binanggit na kasama sa stage play na iyon si Bea Alonzo, BUkod tangi ring hindi siya nakita saglit man lang sa ipinalabas nilang video. Banned ba si Bea sa ABS-CBN na hindi maikakailang masama ang loob nang siya ay umalis doon nang mawalan ng prangkisa?

Tingnan natin iyan. Kung si Bea ay hindi umalis sa ABS-CBN nang mawalan iyon ng prangkisa,ano na ang mangyayari sa kanya? Hanggang ngayon ay maghihintay pa siya, in the meantime lalamig na ang kanyang popularidad. Mabuti kung may nakakakilala pa sa kanya kung makakuha man ng prangkisa ang ABS-CBN.

Kung iyon ngang itinuturing nilang hottest property na si Kathryn Bernardo parang malamig na ang popularidad ngayon eh, at ewan namin kung kumita man lang ba kahit na kalahating bilyon ang kanyang ipalalabas na pelikula. Noon halos P1-B ang kita ng dalawa niyang huling pelikula.

Eh si Bea naman ay hindi pa umabot sa ganoong popularidad, at idineklara nga lang movie queen ng ABS-CBN na napakahilig magbigay ng title sa kanilang stars.

Ngayon ang tanong gagawin ba naman iyon ng ABS-CBN? Bakit nga ba hindi, hindi ba ginawa na rin nila iyan kay Derek Ramsay noon nang lumipat iyon sa TV5. Iyong kanilang film outfit ang nag-distribute ng pelikula ni Derek noon, na ginawa ng isang independent film producer. Inalis nila ang pangalan at picture ni Derek sa advertising poster ng pelikula, at inalis din nila sa trailer. 

Hindi namin napanood ang pelikulang iyon kaya hindi namin alam kung lahat din ba ng mga eksena ni Derek ay edited out sa pelikula. Nagawa nila kay Derek bakit hindi nila magagawa kay Bea?