JaDine fans umaasa pa ring magkakabalikan ang kanilang idolo

HATAWAN
ni Ed de Leon

NAGHIHIMUTOK pa nga ba ang JaDine fans hanggang ngayon sa paghihiwalay ng dalawa? Maliwanag naman ang mga pangyayari. Ginawa silang isang love team, nagkagustuhan, nag-live-in pa nang halos apat na taon. Dumating ang panahon na hindi na ganoon kalakas ang batak ng kanilang love team,  dahil home talent nila, inuna ng Viva si Nadine Lustre.

Si James Reid naman, nag-isip nang magsarili, dahil naisip niyang sikat na siya at kaya na niya on his own. Nagtayo siya ng isang music at talent management company. Sinuportahan pa rin siya ni Nadine umalis iyon sa Viva hanggang nagkademandahan pa para makasama lang siya sa music company at management firm ni James. Kaso wala ring nangyari. Nakagawa ng isang album si Nadine sa ilalim ng kompanya ni James, na hindi naman narinig saan man, natural hindi kikita, walang promo eh. Natauhan na rin siguro si Nadine na walang mangyayari sa career niya, bukod pa nga sa natalo siya sa kaso, at inutusan siya ng korte na sundin ang legal na kontrata niya sa Viva. 

Natural babalik na lang si Nadine sa Viva, na tamang desisyon naman dahil nang magbalik siya, nakagawa siya ulit ng isang hit na pelikula. Samantalang si James, nangangamote pa rin ang career.

Nang tuluyan nang umalis si Nadine at saka lumabas na girlfriend na ni James si Issa Presman, hindi bale iyon dahil wala pa namang career iyon. Hayaan na ninyo sila kung ano gusto nila. Malabo namang pilitin na matuloy pa ang kanilang relasyon against all odds. Wala ka nang ipinaglalaban niyon eh, bakit lalaban ka pa?