HATAW! D'yaryo ng Bayan hatawtabloid.com
LUBOS na nagpapasalamat si Mayor Oscar “Oca” Malapitan sa mga kapatid sa Iglesia Ni Cristo (INC) para sa donasyon nitong hindi bababa sa 200 sako ng bigas sa pamamagitan ng programang Lingap sa Mamamayan.
Ang mga donasyon ay pormal na tinanggap ni City Administrator Oliver Hernandez mula kay INC Tagapangasiwa ng Distrito ng Caloocan-Metro Manila North Bro. Ariel Barzaga, kahapon, Miyerkoles sa Caloocan Sports Complex.
“Muli po kaming nagpapasalamat sa buong Iglesia ni Cristo sa pangunguna ng ating mahal na Ka Eduardo V. Manalo. Damang-dama po namin ang inyong pagmamahal sa mga taga-Caloocan, higit na ngayong panahon ng pandemya. Noon pa man ay napatunayan na po natin na iba lumingap sa mga mamamayan ang mga kapatid natin sa INC,” ayon kay Mayor Malapitan.
Ayon sa punong-lungsod, ang mga bigas ay makatutulong para sa patuloy na pamamahagi ng food packs sa mga pamilya sa lungsod, higit sa mga lugar na kinakailangan isailalim sa lockdown.
Matatandaan, Oktubre noong nakaraang taon ay nagpadala rin ng kanilang donasyong 5,000 food packs ang INC sa lungsod ng Caloocan. Ang mga food packs ay ipinamahagi ng Pamahalaang Lungsod sa mga solo parent at persons with disabilities. (JUN DAVID)
