Binigyan ng 24,000 tablets (Estudyanteng Valenzuelanos)

PINANGUNAHAN ni Valenzuela City Mayor Rex Gatchalian ang pamamahagi ng 24,000 tablets sa mga mag-aaral ng mga pampublikong paaralang elementarya at sekundarya sa lungsod.

“After going through a strict and stringent procurement process, as well as importation process, this week, we will release 24,000 smartphones to our students in our public schools who stated that they do not have any handheld device during enrollment,” ani Gatchalian sa simula ng pamamahagi nitong 5 Enero na tatagal hanggang 9 Enero.

Batay sa enrollment declaration ng Department of Education (DepEd) Valenzuela noong nakalipas na taon, 24,000 sa 130,000 estudyante sa pampublikong paaralang elementarya at sekundarya sa Valenzuela City ang walang smartphone o gadget para sa online classes.

Sa berepikasyon ng DepEd Valenzuela, natuklasan na ang mga student-beneficiaries ay walang kapasidad na makabili ng sariling gadget para sa online classes na nagsimula noong Oktubre 2020 kaya’t naglaan ang pamahalaang lungsod ng P69 millyon para sa pagbili ng nasabing tablets.

Ang mga naturang tablets ay maaaring gamitin sa panonood ng mga aralin sa Valenzuela LIVE Online Streaming School, sa pagbabalik-aral at panonood ng iba pang educational videos.

Nagbilin ang pamahalaang lungsod at DepEd Valenzuela sa mga batang Valenzuelano na ingatan ang kanilang tablets dahil pinhahaha­lagahan rin ng lokal na pamahaalan ang kanilang edukasyon, at sinabing ang mga tablet  ay nararapat lamang gamitin sa paglahok sa online classes at follow-up discussions.

(ROMMEL SALES)