HATAW! D'yaryo ng Bayan hatawtabloid.com
LUMAWAK na ang negosyo ni Marian Rivera na Flora Vida. Hindi na lang ito nakasentro sa flower arrangements na ibinebenta niya.
Sa huling zoom interview niya sa press, ibinalita ni Marian na mayroon na rin siyang Flora Vida Homes na nagkaroon ng launching noong December 8.
Produktong pambahay gaya ng upuan, sofa, throw pillows, kurtina at iba pa ang puwedeng orderin sa kanya online.
May pasorpresa pa si Yan sa masuwerteng client dahil may chance na ang asawang si Dingdong Dantes ang maghatid ng produkto.
Kahit ang Kapuso docu-drama na Tadhana lamang ang show niya, gusting-gusto naman niya ang role ngayon sa buhay na nag-aalaga ng asawa’t anak at nag-iisip ng negosyo na malapit sa kanyang puso.
Sa Flora Vida Homes, hindi pa rin mawawala ang hilig niya sa mga bulaklak na aniya eh marahil namana niya sa kanyang lola.
Anyway, sa nalalapit na Pasko, magkakaroon ng pagbabago sa tradisyong ginagawa nilang mag-asawa.
“Sa bahay na lang muna kami. Hindi gaya noon na sa Cavite kami kasama ang nanay ko and then, kina Dong. Ipasusundo ko ‘yung nasa Cavite at sa bahay na ang selebrasyon.”
Gaya ng halos lahat ng mga tao, wish ni Yan na bumalik na sa normal ang lahat sa 2021.
I-FLEX
ni Jun Nardo
